Aldur og fyrri störf?

Þegar ég ræði málin við suma langskólamenntaða vini mína um pólitík og hvað sé nú helst landi og lýðum fyrir bestu, þá stoppa þeir stundum við að ég hafi fallið í Landsprófi og síðan rétt skriðið sem "fræbúðingur" árið 1970 (búfræðingur af höfuðborgarsvæðinu) frá Hvanneyri.  Þessir "langmenntuðu" vinir mínir frá aðskiljanlegustu tækni- og sósíalskólum Norðurlanda vísa sumsé til þess að ég hafi hreinlega ekki nógu víðtæka menntun til að geta fjallað um málefnin á sama hátt og þau geta.

Það er því sannarlega gullnáma fyrir "fræbúðing" að komast í æviágrip þingmanna á Alþingisvefnum og sjá eftirfarandi um menntun Lilju Rafneyjar formanns sjávarútvegs- og landbúnaðarnefndar:

"Grunnskólapróf frá Reykjum í Hrútafirði 1973 og hefur síðan sótt ýmis námskeið."

Þeir telja nefnilega sumir af mínum langskólamenntuðu vinum, að nýju kvótafrumvörpin séu "alfa og ómega" þess sem koma skal og ég get ekki annað en ályktað að þau trúi að þau séu ígrunduð af þeim sem hafa menntun til slíks.

Næst þegar ég ræði málin við þá langskólamenntuðu ætla ég að leggja að jöfnu Fræbúðing frá 1970 og Grunnskólaprófsnaut frá Reykjum í Hrútafirði 1973; og sjá hvert það leiðir mig!

Þinglok ekki ákveðin